दिल्लीमा मास्क नलगाउनेलाई दुई हजार रुपैयाँ जरिवाना

५ मंसिर, काठमाडौं । भारतको केन्द्रीय राजधानी रहेको दिल्ली प्रदेशमा मास्क लगाउन अनिवार्य गरिएको छ । मास्क नलगाई बाहिर हिँड्नेलाई दुई हजार रुपैयाँ जरिवाना गराइने मुख्यमन्त्री अरविन्द केजरीवालले चेतावनी दिएका छन् ।

मास्क अनिवार्य रुपमा लगाउन पटक पटक आग्रह गर्दा पनि धेरैले बेवास्ता गरेपछि जरिवाना शुल्क बढाइएको हो । प्रदेश सरकारले यसअघि पाँच सय रुपैयाँ मात्रै जरिवाना तोकेको थियो ।

केन्द्रीय राजधानी रहेको नयाँदिल्लीमा कोरोनाभाइरसको महामारी फैलिदै गएपछि सरकारले सतर्कता बढाउने क्रममा जरिवाना पनि बढाएको हो । दिल्लीमा पछिल्लो समयमा कोरोनाभाइरसबाट सङ्क्रमितहरुको संख्यामा बृद्धि हुँदै गएको छ, तर अहिलेसम्म पनि कतिपयले सार्वजनिक स्थलमा मास्क लगउने गरेका छैनन् ।

कोरोनाभाइरसको महामारीको अवस्थाबारे समीक्षा गर्न तथा भावी रणनीति तय गर्न दिल्लीमा भएको सर्वदलीय बैठकपछि ख्यमन्त्री केजरीवालले थप कडाइ गर्न लागिएको जानकारी दिए ।
बैठक पछिको पत्रकार सम्मेलनमा उनले जनताको जीवन बचाउनका लागि संयुक्त रुपमा काम गर्न सबै पार्टीहरु सहमत भएको बताए ।

‘सबै पार्टीहरुको तर्फबाट मलाई सहयोग र सुझाव आएको छ, यो कठिन घडीमा हामी सबै एकै ठाउँमा छौँ, त्यसका लागि म उहाँहरु सबैप्रति धन्यवाद ज्ञापन गर्न चाहन्छु,’ उनले भने ।