म्यानचेष्टर सिटीलाई १३ अंकको अग्रता

१६ फागुन, काठमाडौं । प्रिमियर लिग फुटबलमा शीर्ष स्थानको म्यानचेस्टर सिटीले वेष्टहम युनाइटेडलाई पराजित गर्दै १३ अंकको अग्रता बनाएको छ ।

शनिबार भएको खेलमा सिटीले वेष्टहमलाई २-१ गोल अन्तरले पराजित गरेको हो । घरेलु मैदानमा सिटीलाई जित दिलाउन रुबेन डियास र जोन स्टोन्सले गोल गरे ।

खेलको ३०औं मिनेटमा डियासले गोल गर्दै सिटीलाई अग्रता दिलाएका थिए । तर, ४३ औं मिनेटमा वेष्टहमका मिचेल एन्टोनियोले बराबरी गोल फर्काए ।

६८ औं मिनेटमा स्टोन्सले गोल गर्दै सिटीलाई २-१ को जित दिलाए ।

यो जितपछि सिटीले सबैखाले प्रतियोगितामा लगातार २०औं जित हात पारेको छ । प्रिमियर लिगमा भने सिटीको यो लगातार १४औं जित हो ।

जितपछि सिटीले दोस्रो स्थानको म्यानचेष्टर युनाइटेडमाथि १३ अंकको अग्रता बनाएको छ ।

लिग लिडर सिटीले २६ खेलबाट ६२ अंक जोडेको छ । दोस्रो स्थानको युनाइटेडको २५ खेलबाट ४९ अंक छ ।

२६ खेलबाट ४५ अंकसहित वेष्टहम चौथो स्थानमा छ ।